പ്രണയത്തില്....
പ്രണയമായ് ഇന്നെന്റെ കനവിന്റെ ചില്ലയില്
ഉദ്ദീപ്തമായൊരു താരമേ മായല്ലേ..
യാത്ര പറഞ്ഞു നീ പോയിടൊല്ലേ , നിന്റെ
കണ്ണീരില് എന്നെ നനച്ചിടൊല്ലേ...
നീ ഇന്നുദിച്ചതിന് മൂലമെന്നുദ്യാന-
മാകെ വിടര്ന്നത് കാണ്മതില്ലേ?
എങ്ങും സുഗന്ധം പരക്കയല്ലേ, എന്റെ
നിനവിലും നീ വന്നു നിറകയല്ലേ...
എന്റെ പ്രണയമേ എന്റെ ഹൃദ്സ്പന്ദമേ,
നീയെന് വിരല് തുമ്പു തൊട്ടിടുമ്പോള്
നോവുകളൊക്കെ മറക്കയല്ലേ, എന്റെ
മിഴികളില് സൂര്യന് ഉദിക്കയല്ലേ?
ചാരത്തണഞ്ഞു നിശ്ശബ്ദമിരിക്കിലും
മധുരമാം ഗീതം ശ്രവിപ്പതില്ലേ
കാറ്റിലും ചുംബന ഗന്ധമില്ലേ, മണ്ണു
മഴതേടി എപ്പോളോ തേങ്ങിയില്ലേ? പീലി വിടര്ത്തി നിന്നാടിയില്ലേ മനം
ഒരു മയില്പേടയായ് മാറിയില്ലേ
ചിറകുകള് തേടി ഉഴന്നതില്ലേ, എങ്ങും
പാറി പറക്കാന് കൊതിച്ചതില്ലേ?
പ്രണയമേ നീ അരികില് ഒരുവേളനില്ക്കവേ
എന്നെ മറന്നു ഞാന് പാടിടുന്നു...
എന്നെ വിട്ടെങ്ങും നീ പോയിടൊല്ലേ, നിന്റെ
കണ്ണീരില് എന്നെ നനച്ചിടൊല്ലേ...
2 comments:
" pranayamee ninte kanneerill enne nanachidolee.." beautiful concept. oru pattu poole padavunna varikall.
Thank U......
Post a Comment